ഗുണ്ടൽപേട്ട: ഗുണ്ടൽപേട്ട-മൈസൂർ പാതയിൽ തുടർക്കഥയാകുന്ന വാഹനാപകടങ്ങളിൽ ദുരൂഹതയുണ്ടെന്നും സമഗ്രമായ അന്വേഷണം വേണമെന്നും ആവശ്യം ശക്തമാകുന്നു. വിനോദസഞ്ചാരികളാണ് ഇത്തരം അപകടങ്ങളിൽ കൂടുതലായി പെടുന്നത് എന്നത് ആശങ്ക വർധിപ്പിക്കുന്നു.
കേവലം സ്വാഭാവിക അപകടങ്ങൾ എന്ന് എഴുതിത്തള്ളാതെ, ഈ അപകടങ്ങൾക്ക് പിന്നിൽ മറ്റ് കാരണങ്ങളുണ്ടോ എന്ന് പരിശോധിക്കണമെന്നാണ് ആവശ്യം. ചില അപകടങ്ങൾ മനഃപൂർവം സൃഷ്ടിക്കപ്പെടുന്നതാണെന്ന തരത്തിലുള്ള വാർത്തകളും പുറത്തുവരുന്നുണ്ട്.
അപകടങ്ങൾക്ക് പിന്നിൽ കവർച്ചാ സംഘങ്ങൾക്ക് പങ്കുണ്ടോയെന്നും അന്വേഷിക്കണമെന്ന ആവശ്യം ഉയർന്നിട്ടുണ്ട്. വിനോദസഞ്ചാരികളെ ലക്ഷ്യമിട്ട് അപകടങ്ങൾ സൃഷ്ടിച്ച് കവർച്ച നടത്തുന്ന സംഘങ്ങൾ ഈ മേഖലയിൽ പ്രവർത്തിക്കുന്നതായി സംശയങ്ങളുണ്ട്. അതിനാൽ, തുടർച്ചയായി അപകടങ്ങൾ നടക്കുന്ന സ്ഥലങ്ങൾ കേന്ദ്രീകരിച്ച് കർണാടക പോലീസ് കൃത്യമായ അന്വേഷണം നടത്തണമെന്നും രാത്രികാല പട്രോളിംഗ് ശക്തമാക്കണമെന്നും യാത്രക്കാർ ആവശ്യപ്പെടുന്നു.
മുനീർ പാറക്കടവത്ത്